Merkileg helgi

Margt og mikið búið að gerast þessa helgi, og ekki er hún búin enn!
Fyrst fengum við myrkvunartjöldin í herbergið sem voru pöntuð í maí takk fyrir pent. Við erum með svona Velux þakglugga og það er hægt að kaupa einhver gluggatjöld sem eru alveg sérsniðin fyrir þessa glugga. Þeir voru samt ekki alveg að standa sig í stykkinu þarna hjá Byko, því fyrsta pöntun var aldrei send af stað því liturinn sem við vildum var ekki til - og við látin vita þegar við hringdum rúmum mánuði seinna til að athuga hvar í fj... gluggatjöldin væru. Næsta pöntun fór af stað en jólasveinarnir höfðu tekið niður vitlaust númer á glugganum þannig að tjöldin pössuðu ekki. Við þurftum að fá gæja frá Byko hingað niður eftir til að hjálpa okkur að losa helv... tjöldin. Svo loksins á föstudaginn komu tjöldin (við höfum ekki hugmynd um hvort það var liturinn sem við vildum, við vildum bara fá tjöld sem passa!) og upp fóru þau við mikinn fögnuð, enda við búin að sofa með álpappír og svarta ruslapoka sem hávær skýli fyrir birtunni síðan við komum heim í júní. Er bara mest fegin að tjöldin hafi komið á undan Lillu! ;)

Fórum í Kringluna (úfffff erfitt) síðdegis á föstudaginn og keyptum okkur Lavenderolíu og nuddkúlur og ég fékk þvílíku meðferðina um kvöldið! Elska lyktina af Lavender, tek þessa sko með upp á fæðingardeild þegar þar að kemur!

Fórum í bíó á Get Smart um kvöldið... ég hló svo mikið að ég hélt að barnið myndi fæðast á ganginum í bíó bara! Þetta var orðið erfitt í restina ;)

Í gær fór ég svo í fjölmennasta fimm ára afmæli sem sögur fara af! Litla frænka hans Bjarna átti sem sagt afmæli og við fórum og hittum fullt af fólki, sem er nú aldrei leiðinlegt, og fengum heita rétti að borða, sem er sko heldur aldrei leiðinlegt ;) Þetta heppnaðist mjög vel í alla staði og litla skottið alveg hæst ánægt með daginn skildist mér á foreldrunum :)
Úr þeirri afmælisveislu fórum við svo í óformlegt kaffi til Söru vestur í bæ þar sem Bjarni greyið mátti sitja undir umræðum um óléttu, fæðingar og þyngdaraukningu, enda ég, Sara og Ástrós að spjalla og þær báðar mömmur ... getið rétt ímyndað ykkur hvað hann var hress með það hehe...
Bjarni hafði verið tiltölulega bjartsýnn á að meika að fara í grill eftir afmælið hjá frænku sinni, en hætti snögglega við það þegar við fórum frá Söru, enda gjörsamlega að springa eftir veitingar dagsins ;) Hann fór því bara í póker heima hjá Bigga -sennilega í síðsta skiptið í bili hjá greyinu - og ég fór að horfa á Harry Potter (en ekki hvað ... ).

Í dag á svo að sótthreinsa herbergið, pakka ofan í spítalatöskuna og mögulega þrífa bílinn aftur, allt hvað við náum að gera. Eigum líka alltaf eftir að ná í himnasængina á rúmið fyrir prinsessuna. Ætluðum líka að reyna að kíkja á Þóru og Einar Geir, en ég er búin að vera með smá kvef þannig að ég þori nú eiginlega ekki að bjóða nýja unganum þeirra upp á það og það verður eflaust að bíða betri tíma. Nema ég sendi Bjarna sendiherra bara :)

Nú er aðal málið hvort prinsessan mæti fyrir eða eftir settan dag - amma Bjarna sagði í gær að það yrði nú örugglega farið að færast fjör í leikinn í nótt eða næstu nótt, við spyrjum bara að leikslokum! Myndi svo sem ekkert kvarta yfir því að fá hana aðeins fyrr í fangið (enda fræg fyrir óþolinmæði, jú og svo stundvís með eindæmum), en þetta kemur allt í ljós! Verð fyrst farin að örvænta á fimmtudaginn eftir viku held ég ;)

Sjáumst börnin góð... ekki vera feimin við að kíkja í heimsókn til mín á daginn, mér leiðist nefnilega stundum alveg óhóflega og ekki er orkunni mikið fyrir að fara til að kíkja mikið út þó að ég reyni að fara eitthvað á hverjum degi, fínt að fá nokkrar heimsóknir líka ÁÐUR en litlan kíkir á okkur ;)

Síðasta lag fyrir fréttir

Punktablogg í dag:

• Erum að fara að skoða fæðingardeildina á eftir. Væri nú ekki leiðinlegt ef maður færi bara ekkert heim aftur nema með dótturina í fanginu!

• Íris og Ásdís Katla eru farnar til Boston í mæðgnaferð - vonandi verður gaman hjá þeim! Við Bína erum bara strax farnar að sakna þeirra, og þær fóru bara í gær...
  

• Fór með strætó alla leiðina í Laugardalslaugina í gær (sirka 4 km leið, tók 50 mínútur frá A til B) og hitti þar Dúu og litla heimspekinginn hana Gyðju. Litla alveg að fíla sundið en ekki alveg að fíla það jafn mikið að vera látin dúsa á einhverju kaffihúsi með gömlu vinkonunum ;) Skemmtum okkur konunglega saman og áttum frábæran dag :)


• Það er komið haust og ég er ekki að fara í skóla. Ég kann það ekki.


• Þóra og Einar Geir eru orðin foreldrar, ekkert smá fallegt lítið barn sem þau eignuðust síðasta föstudag í miðjum leik Íslands og Spánar, ekki leiðinlegt það ;) Til hamingju elsku skötuhjú!


• Við Bjarni keyrðum niður á Kirkjusand á menningarnótt til að horfa á flugeldana sem var bara gaman, fullt af fólki fékk sömu hugmynd og þar á meðal ein fjölskylda sem parkeraði nákvæmlega akkúrat fyrir framan okkur og var frekar sein í því og settist svo upp í bíl og keyrði af stað áður en flugeldasýningin kláraðist! Greinilega ætlað að vera á undan traffíkinni úr miðborginni, sem gekk reyndar hratt og vel. Sumir eru bara alltaf að flýta sér.


• Kúlan stækkar á ógnarhraða, enda kannski ekki við öðru að búast...


• Verð mjög líklega ein heima helgina 29. nóvember til 1. desember (give or take) þar sem Foreldraveldið verður í London (það er verið að flytja verk eftir pabba á suðurbakkanum, langar ekkert smá mikið með!!) og Spúsinn í Köben að læra fyrir og taka próf. Auglýsi hér með eftir sjálfboðaliða til að gista hjá mér og leika við mig þá helgina.


• Lífið er annars bara frábært og við erum næstum því eiginlega bara farin að bíða eftir því að fá dótturina í fangið... þó svo að settur dagur sé ekki kominn! Minni á barnalandssíðuna, http://kentish.barnaland.is - ef einhver var ekki búinn að sjá ;) Skrifa ítarlegri kúlubúafréttir þar, ekki hér!

Fleira er ekki í fréttum.
Góðar stundir.

Vikur: 38. Afmæli: 24. Framtíðarplön: Tja...

Jæja þá er síðasti afmælisdagurinn sem stelpuskjáta runninn upp. Næsta afmælisdag verð ég móðir (óboj). Ég man að þegar Bjarni átti 24 ára afmæli hvað mér fannst hann vera orðinn stór! Mér finnst ég ekki næstum því eins stór og mér fannst hann vera þá, en ég er líka svo öfugsnúin.

Í tilefni dagsins fór ég út í Kringlu í morgun og fjárfesti í einni Friis&Company tösku (danskt), einu Pilgrim hálsmeni (líka danskt) og svo Lancome glossi (eitthvað útlenskt). Var ómeðvitað greinilega að styrkja efnahag danskra hönnunarfyrirtækja - hef sennilega vorkennt þeim slæmt gengi í handboltanum svona í undirmeðvitundinni.

Stefnan er svo tekin á foreldrafræðslunámskeið #2 klukkan 17 og svo út að borða með Bjarna mínum og Dagnýju klukkan einhvern-tímann-í-kvöld að fagna lítillega og afar hógvært þessum merkisdegi sem afmælið mitt er.

Mig langar svo í skóla í haust að mig verkjar í skrifvöðvana. Ef að litla prinsessan okkar verður gott og þægt barn laust við alla magapínu er aldrei að vita nema ég skelli mér í einn eða tvo kúrsa eftir áramót og reyni að halda í æskuljómann sem háskólapía öööörlítið lengur. Mér finnst nefnilega svo gaman að læra. Er það skrýtið að ég þrái að verða kennari - hugsa ekki um annað en skólabyrjun á hverju hausti, og er þó alltaf orðin jafn sjúklega leið á hverju vori. Öfugsnúið much?

Nýr borgarstjóri tekur við í Reykjavík í tilefni afmælis míns - hverjum er ekki sama segi ég nú bara. Óld njús. Legg frekar til að við reynum að sniðganga þessa borgarpólitík meðvitað og ákveðið og förum og gerum eitthvað sjálf.

Dúa mín lendir svo á klakanum í dag í tilefni dagsins -hlakka til að knúsa þær mæðgur :)

Hafið það gott á þessum dúndurdegi elskurnar, ég veit að ég mun njóta hans!

Love love
EddaK
- Getting older by the wrinkle

Rúllupylsan

Fólk heldur að ég sé að grínast þegar ég segist vera með bjúg og ekki komast í neina skó nema skítlélegu TopShop skóna sem ég keypti í fyrrahaust (og lifðu af allan veturinn, kannski ekki svo skítlélegir eftir allt.. beside the point). Til þess að gera lesendum mínum grein fyrir alvarleika málsins ákvað ég svona áðan að taka mynd af fótunum á mér, sem þó eru búnir að hjaðna töluvert síðan í gærkvöldi. Í gærkvöldi voru þeir nefnilega dofnir og farnir að blána og mér leið eins og ég væri að labba á nálapúða. Et voilá:

Á ennþá töluvert erfitt með að ganga svo vel fari og finnst erfitt að beygja fótinn. Blessuð bólgan nær nefnilega upp fyrir hné og gott betur. Puttakreppingar eru líka frekar erfiðar. Nú veit ég ekki hvort fólk gerir sér grein fyrir því hversu gríðarlega mikil bólga þetta er... en ég er með spenntar tær á þessari mynd og sé ekki í sinarnar á ristinni, sem ég þó sá oft og mikið during my dancing days, enda alltaf verið með svo helvíti grannan fót.

Það er sem sagt ekkert grín að vera svona og því skal engan undra að ég sé svona mikið heima hjá mér... reyndar verð ég að játa það að ég ofgerði mér kannski heldur mikið á sunnudaginn og borðaði kannski heldur mikið af salti, en er að reyna að vinna það niður núna með því að stúta vatnsmelónum by the barrel! Vil helst komast í spariskóna á fimmtudaginn nefnilega, því þá á ég afmæli :) 

Jæja þar til næst - og ég vil fá komment ! Sérstaklega frá fólki sem heimtar e-mail og hótar mafíuofsóknum ef maður skrifar ekki (Krummi) ! :)

Hrossaflugufárið mikla

Eins og allir vita eru flugur hinn mesti óþrifnaður sem er best geymdur utandyra og alls ekki og ómögulega innandyra, þar eð allir verða pirraðir. Á góðu sumri á Íslandi hefur maður þó yfirleitt þurft að heyja marga hetjulega baráttuna við húsflugur og einstaka geitung sem gera sig einum of heimakomnar innan fjögurra veggja heimilisins. Sexfætlingar þessir er voga sér inn um gegnsæja glugga og opnar svalahurðar stunda oft á tíðum síendurteknar árásir á heimilismenn sem neyðast til að bægja kvikindunum frá sér, ýmist með höndum, viskastykkjum eða þar til gerðum rafmögnuðum tennisspöðum, sérhönnuðum til að klekkja á kvikindunum.
Þetta sumar hefur ekki verið frábrugðið þeim er á undan hafa farið í flugnageiranum, nema þá helst að einu leyti. Það eru hrossaflugur ALLS STAÐAR. Þegar mest var taldi undirrituð einar fimm innandyra sama daginn og þótti þá heldur keyra um þverbak.
Hrossaflugur (e. Daddy long-leg) eru einkar þreytandi innanhúss þar sem þær hafa þennan hvimleiða eiginleika að geta hoppað og skoppað út um allar trissur á löngum löppum og eru bara yfirhöfuð fyrir. Ég er ekki alveg að átta mig á hvers vegna það er svona mikið af þeim í tíðinni núna samt, en þetta sumar minnir mig hins vegar óþyrmilega á sumar í kringum svona 1990 þegar Höskuldur frændi (öðru nafni Boston-Pési) stundaði það ásamt Böbba vini sínum að veiða hrossaflugur og slíta af þeim lappirnar, allt í vísindalegum tilgangi að sjálfsögðu. Ég veit hins vegar ekki hvernig Íslandi mun farnast án Boston-Pésa til þess að fækka hrossaflugum þetta sumar og þau er á eftir koma.
Ég er mikið að hugsa um að skrifa epíska skáldsögu um þetta hrossaflugufár og mögulega selja réttinn til stórs kvikmyndavers í Hollívúdd (e. Tinsel Town) þannig að við getum öll horft á þann sumarsmellinn sumarið 2010, umkringd hrossaflugum að sjálfsögðu. Tveir fyrir einn ef þú kemur með eina lappalausa í eldspýtnastokk.

Ólympíuföstudagur

Jújú, það er ólympíuföstudagur í fleiri en einum skilningi. Augljóslega hófust leikar formlega í dag, en það er ekki þar með sagt að Kínverjar séu þeir einu sem eru duglegir, ónei. Mín er líklegast búin að fara í gegnum allan fatahauginn af dótturinni tilvonandi og strauja og setja í poka með slaufu í glænýja og nýþvegna kommóðu takk fyrir pent. Ekki amalegt að fá að vera svona lítil pæja í nýstraujuðum fötum (sem eru í glænýrri og nýþveginni kommóðu) þegar maður kemur í heiminn!

Svo er kannski rétt að árétta það að spúsinn var að steggja besta vin sinn síðustu helgi og hafði því ótakmarkað útivistarleyfi ;) Lalli og Louisa eru nefnilega að fara að gifta sig bara á morgun og þar sem Lalli kom ekki til landsins fyrr en síðasta föstudag var síðasti laugardagur tekinn með áðurnefndu trompi. Ekki oft sem maður fær að steggja besta vin sinn nefnilega sjáiði til! Bróðurpartur þessarar viku er svo búinn að fara í klippingar og límingar á steggjunarmyndbandinu sem verður frumsýnt í veislunni annað kvöld og afraksturinn er ansi skemmtilegur. Hefur greinilega ekki verið leiðinlegt hjá þeim! Við erum að reyna að koma herlegheitunum yfir á jútjúb svo æstir aðdáendur geti fylgst með.

Á meðan þvottavélin hefur verið að vinna yfirvinnu hefur móðirin tilvonandi legið í sófanum svona þegar stund gefst á milli straustríða. Meðgangan nefnilega farin að taka sinn toll og það tekur á að drösla þessum líkama á milli staða svo ekki sé meira sagt. Alls konar verkir og pot og hnjask og samdrættir farnir að gera vart við sig og maður vonar nú að þetta teygist ekki í hinn endann, enda verkfall ljósmæðra áætlað 4. september, sem er einmitt dagurinn sem ég er sett. Þessarar meðgöngu verður því minnst sem verkfallameðgöngunnar miklu, þar sem ekki var það betra í Danaveldi! En við styðjum auðvitað málstaðinn heilshugar.

Það er verið að endursýna setningarathöfn ólympíuleikanna núna á sænska tívíinu og mikið djöfulli var þetta flott. Hvað myndum við Íslendingar svo sem gera ef við myndum einhvern tímann vera valin til þess að halda leikana? Hafa glímusýningu og fallnar stjörnur á borð við Sylvíu Nótt til annars konar skemmtunar? Nei það er kannski bara fínt að við á litla Íslandi reynum ekki að feta í fótspor Kínverjanna, sem eiga listamenn í hrönnum fyrir hverja þá listgrein sem hugurinn girnist. Til dæmis virðist ekki hafa verið vandasamt fyrir þá að finna nákvæmlega 2008 slagverksleikara fyrir fyrsta atriðið sem voru svo fáránlega samhæfðir að maður sem dansari má hreinilega skammast sín. Virkilega flott og vel gert í alla staði og greinilega nóg af hæfileikafólki í lýðiveldi fólksins Kína. Verst að þeir geta ekki virt mannréttindi aðeins betur (fann tildæmis sárlega til með stelpunum sem þurftu að dansa í tvo og hálfan tíma undir inngöngu íþróttamannanna í hvítum plaststígvélum og bara með eina vatnsflösku á mann, viss um að plástrasala tekur kipp í þarlendum apótekum á morgun...) og leyft fólki að segja sína meiningu og lesa og komast að því sem það vill á Internetinu. Hneyksl hneyksl. But who are we to judge.. kannski ættum við Íslendingar að taka til í eigin bakgarði áður en við förum að reyna að reyta arfann í þeim næsta.

Jæja ég óska ykkur góðrar helgar! Nú bíðum við bara spennt eftir ágústbörnunum sem eiga að láta sjá sig og að sjálfsögðu okkar eigin, þó að nóg sé annað um að vera fram að áætluðum fæðingardegi!

Heyrumst

EddaK
- straujar á fullu gasi

Stífluð

Já, ritstífla á stærð við Klettafjöllin hefur gert sig kærkomna í kollinum á mér, og setið það reyndar sem fastast í nokkra mánuði núna. Ég þurfti að leita þrjú ár aftur í tímann, nánar til tekið í flokkinn September 2005, til þess að finna hjá mér einhverja þörf til að skrifa hérna inn.

Ég er að bíða eftir að Bjarni vakni. Pungurinn skellti sér á 23 klukkustunda djamm í gær/dag og er ekki enn vaknaður. Þegar það loksins gerist verður svo ekki sýnd nein miskunn, upp skal kommóðan sem var keypt í IKEA í vikunni, og safnhaugurinn á gólfinu í herberginu okkar skal flokkaður. Ég er aðeins farin að panikka yfir því að barnið ákveði kannski að mæta bara á miðvikudaginn og ekkert verði tilbúið.
Ég er yfirleitt frekar óróleg í svefni on my best days, en þegar Pungurinn er fjarstaddur og ekki heyrst píp í honum í heilan sólarhring er svefni eitthvað lítið fyrir að fara. Ég svaf í heilar fjórar klukkustundir, vaknaði svo klukkan hálf fimm í morgun og fann ekki Eiginmanninn undir sænginni og gat svo ómögulega sofnað aftur. Klukkan sex sé ég svo að leigubíll er að keyra frá húsinu og þá er maðurinn mættur á heimaslóðir og var ekki lengi að skutla sér undir sæng og sofna með einhver afar frumstæð orðaskipti á vörunum sem reyndust samt nokkuð óskiljanleg. Ég náði loks að festa blund eitthvað í kringum sjö leytið en ekki vildi betur til en svo að ég vaknaði upp með andfælum þegar frá manninum bárust þvílíku óhljóðin í formi hrota að þau hljóta að hafa verið yfir leyfilegum hávaðamörkum fyrir hádegi á sunnudegi. Ég er hreinlega hissa á að nágrannarnir hafi ekki bankað og kvartað ókurteislega (kannski allir í Eyjum... ). Ég flúði því niður í stofu þar sem ég bylti mér í sófanum í þrjú korter, en gafst svo fyrir rest upp á því að bíða eftir að Óli Lokbrá myndi mæta og vippaði mér á fætur.
Og ég get sagt ykkur það í óspurðum að fimm tíma svefn komin átta mánuði á leið er bara ekki að gera sig...
Já og það er heldur ekki kúl, þegar maður er kominn átta mánuði á leið og að kafna úr hita, að hitta einhvern í barnabúð sem maðurinn manns þekkir sem kann sig ekki betur en svo að byrja að ræða fyrrverandi kærustu Eiginmannsins fyrir framan augljóslega kasólétta núverandi kærustuna.
Hnuss.

Eitthvað verður maður nú að reyna að vera jákvæður hérna líka á þessu bloggi sínu - og ég er óendanlega þakklát fyrir skýjahuluna sem er búið að draga yfir okkur borgarbúa núna. Loksins get ég hætt mér út fyrir hússins dyr án þess að þurfa að gefa út landlæga viðvörun um að mannlegur svitakirtill með skapofsaeinkenni sé úti á meðal manna. Það er nefnilega ekkert grín að vera með eina svona sæta bínu innanborðs í svona hita. Tek ofan af fyrir Sigrúnu sem hreinilega átti sína í mesta hitanum á fimmtudaginn var! Til hamingju elsku Sigrún :)

Jæja - allir sem eru ekki í útilegu akkúrat núna eru vinsamlegast beðnir um að taka sig til og kommenta, nú fer hver að verða síðastur að láta rödd sína heyrast á þessu bloggi áður en eigandinn verður móðir (sem gæti alveg eins gerst á eftir, hvað veit maður nema Bína ákveði að mæta í heiminn þegar ekkert er tilbúið, bara til að hrekkja hýsilinn... )! Hvet alla eindregið til að nýta sér þennan einstaka möguleika.

Þar til síðar börnin góð
EddaK
- mætti halda að maður væri óléttur eða eitthvað...

Komin úr heiðardalnum

Var á Illugastöðum (sumarbústaðaland um 40 mínútur frá Akureyri) í viku. Er núna komin heim og veit ekkert hvað ég á að segja því ég held að heilinn á mér sé soðinn vegna hitans á landinu. Eða bjúgaður vegna ofneyslu á súkkulaði. Kem með eitthvað djúsí síðar.
Farið varlega um verslunarmannahelgina.